Qyzylordanyń sol jaǵalaýynda 11 myń kórermenge arnalǵan jańa stadıonnyń ashyldy. Osyǵan oraı uıymdastyrylǵan sharadan keıin fýtboldan el kýbogynyń fınaldyq matchynda «Ordabasy» (Shymkent) men «Tobyl» (Qostanaı) komandalary kezdesti, dep jazady Egemen.kz.
Stadıonnyń ashylýyna Týrızm jáne sport mınıstri Erbol Myrzabosynov, Qazaqstan fýtbol federasııasynyń prezıdenti Marat Omarov arnaıy keldi.
Aımaq basshysy Nurlybek Nálibaev myńdaǵan jankúıerdi jańa nysannyń ashylýymen quttyqtap, komandalarǵa sáttilik tiledi.
«Jańa stadıonymyzdyń ashylýy fýtboldan Qazaqstan kýbogynyń fınaldyq oıynymen tuspa-tus keldi. Jankúıerler asyǵa kútetin sport merekesi otandyq fýtbol tarıhynda alǵash ret Qyzylorda qalasynda ótip jatqany syrboıylyqtar úshin úlken mártebe, zor maqtanysh! Qalamyzda jańa nysannyń salynýyna erekshe qoldaý bildirgen Memleket basshysyna, Úkimetke barsha Syr jurtshylyǵy atynan shynaıy alǵysymyzdy bildiremiz. Fınaldyq oıyndy ótkizýge bastamashy bolyp, uıymdastyrǵan Qazaqstan fýtbol federasııasyna zor rızashylyǵymyzdy jetkizemiz!», dedi oblys basshysy.
Aýdany 20 myń sharshy metr bolatyn «Qaısar Arena» ÝEFA-nyń 4-sanatyna sáıkestendirilgen. Halyqaralyq talaptarǵa saı salynǵan stadıonda fýtbol alańy ǵana emes, olımpıadalyq standarttarǵa sáıkes keletin boks, kúres, fıtnes, sporttyq gımnastıka jáne aýyr atletıka zaldary bar.
Ashylý saltanatynan keıin bastalǵan fınaldyq oıynnyń bas tóreshisi shveısarııalyq Sven Volfensberger boldy. Birinshi taımnan-aq «Tobyldyń» tegeýrini aıqyn sezildi. Esepti Ashat Taǵybergenniń aıyp soqqysynan keıin Nıkolaı Sıgnevıch ashty. Baǵanaǵa tıip keri qaıtqan dopty dopty qaqpaǵa dál baǵyttan Islam Chesnokov ekinshi gol avtory atandy.
Ekinshi taımda «Ordabasy» belsendi shabýylǵa shyqqanymen esep ózgermedi. Osymen úshinshi márte kýbok ıesi atanyp otyrǵan «Tobyl» kelesi maýsymda Konferensııalar lıgasyna qatysý quqyǵyna ıe boldy.